Cultura

As XXI Xornadas de Cultura Mariñeira “Muros Mira ao Mar” volverán converter, do 10 ao 12 de xullo, o centro histórico e o porto de Muros nun gran espazo de encontro arredor da cultura mariñeira, cunha programación que combina música, patrimonio, tradición, gastronomía, teatro, artes de rúa e actividades para todos os públicos.

Durante tres días, veciñanza e visitantes poderán desfrutar do tradicional Mercado Mariñeiro, navegación en embarcacións tradicionais, visitas guiadas ao conxunto histórico, ao Porto e Lonxa e ao Museo do Mar, demostracións de oficios artesanais, obradoiros, exposicións, actividades infantís, faladoiros e showcookings que poñerán en valor o patrimonio material e inmaterial vinculado ao mar.

A programación musical volverá ter un papel destacado no Curro da Praza coa actuación de Sés o venres 10 de xullo e de Tona o sábado 11, ambos concertos incluídos na Rede Cultural da Deputación da Coruña. O domingo 12 celebrarase o tradicional Festival Folclórico coa participación da AF Ximiela (Muros), a AC Rosalía de Castro (Teo) e a agrupación portuguesa Amendoeiras em Flor, fortalecendo os vínculos culturais entre Galicia e Portugal.

As artes escénicas tamén estarán presentes cunha programación de rúa integrada por propostas para todos os públicos, entre elas o espectáculo de maxia Flash, o teatro Hamelín, o espectáculo de circo Desastronauts, a representación Un mar de fala de Aquelando Teatro e a narración oral Costureiriña bonita, que levarán a animación a diferentes rúas e prazas da vila.

Unha nova edición de Muros Mira ao Mar que volverá reivindicar a identidade mariñeira da vila a través dunha programación diversa, participativa e aberta a toda a cidadanía.

PROGRAMA

---

O Auditorio do Centro Cultural e Xuvenil de Muros continuará a súa programación cinematográfica coa proxección de El drama, unha das estreas máis destacadas da tempada, protagonizada por Zendaya e Robert Pattinson.

Dirixida e escrita por Kristoffer Borgli, a película presenta unha historia que combina romance, drama e humor arredor dunha parella que se atopa ás portas do matrimonio. Emma e Charlie viven unha relación aparentemente perfecta e están a piques de celebrar a súa voda. Porén, unha inesperada revelación fará que todo o que crían saber un do outro se poña en cuestión, obrigándoos a enfrontarse a unha situación que cambiará por completo o rumbo da súa relación.

O filme explora as complexidades das relacións de parella, as expectativas e os segredos que poden saír á luz cando todo parece estar decidido. A través dunha combinación de emoción, ironía e tensión narrativa, El drama ofrece unha mirada contemporánea ás relacións persoais.

Xunto a Zendaya e Robert Pattinson, o reparto complétase con Alana Haim, Mamoudou Athie e Hailey Gates, entre outros intérpretes.

A concelleira de Cultura do Concello de Muros, Caridad González, destacou que “seguimos traballando para ofrecer unha programación cinematográfica variada e actual, con títulos que están a espertar interese entre o público e que permiten achegar ao auditorio producións internacionais de primeiro nivel”. A edil engadiu que “a presenza de actores tan recoñecidos como Zendaya e Robert Pattinson converte esta película nunha proposta especialmente atractiva para os amantes do cinema”.

As sesións de El drama terán lugar nas seguintes datas:

• Venres, 19 de xuño ás 21:30 h
• Sábado, 20 de xuño ás 20:00 h e ás 22:00 h
• Domingo, 21 de xuño ás 19:30 h

As entradas poden adquirirse a través da billeteira electrónica do Concello de Muros e nas oficinas do Centro Cultural e Xuvenil de Muros.

Con esta nova proxección, o Concello de Muros continúa consolidando a programación de cine no Auditorio do Centro Cultural e Xuvenil, achegando ao público títulos de actualidade e producións de relevancia internacional.

---

O Concello de Muros vén de convocar as subvencións dirixidas a entidades sen ánimo de lucro para a realización de actividades culturais durante o ano 2026.

O obxectivo desta liña de axudas é apoiar o desenvolvemento de proxectos e actividades culturais no municipio de Muros promovidos polas entidades asociativas do concello.

Poderán solicitar estas subvencións as entidades sen ánimo de lucro legalmente constituídas e rexistradas no Rexistro de Asociacións de Galicia, con sede e ámbito de actuación no Concello de Muros, que desenvolvan actividades culturais.

A contía máxima da axuda será de 1.500 euros por proxecto, debendo a entidade beneficiaria achegar un mínimo do 10 % do custo total da actividade subvencionada.

O prazo de presentación das solicitudes permanecerá aberto do 10/06/2026 ao 10/07/2026, ambos os dous incluídos. As solicitudes deberán presentarse mediante os modelos normalizados dispoñibles na sede electrónica e na páxina web municipal.

Para máis información e acceso á documentación da convocatoria, as persoas interesadas poden consultar a sede electrónica e a páxina web do Concello de Muros.

Bases xerais
Convocatoria
Formularios

---

O Auditorio do Centro Cultural e Xuvenil de Muros celebrará o primeiro aniversario da recuperación da programación cinematográfica cunha proxección moi especial: Casablanca, unha das películas máis emblemáticas da historia do cine.

O filme poderá verse o sábado 13 de xuño ás 20:00 e ás 22:00 horas e o domingo 14 de xuño ás 19:30 horas, nunha fin de semana dedicada a conmemorar un ano de cine estable no auditorio municipal.

Dirixida por Michael Curtiz e estreada en 1942, Casablanca converteuse nun clásico universal do cinema. Ambientada durante a Segunda Guerra Mundial na cidade marroquí de Casablanca, a película narra a historia de Rick Blaine, propietario dun café frecuentado por refuxiados que buscan escapar da guerra, cuxa vida cambia coa chegada dun antigo amor, Ilsa Lund. Protagonizada por Humphrey Bogart e Ingrid Bergman, a obra é considerada unha das grandes referencias da historia do cine pola súa combinación de romance, drama e contexto histórico.

Durante este primeiro ano de programación cinematográfica, o Auditorio do Centro Cultural e Xuvenil de Muros recibiu a máis de 4.000 espectadores, consolidándose como un espazo de referencia para a exhibición audiovisual na comarca. Ao longo destes meses proxectáronse máis de 40 películas, incluíndo producións galegas, estatais e internacionais, así como cinema familiar, documentais, estreas comerciais e títulos de especial interese cultural.

A concelleira de Cultura do Concello de Muros, Caridad González, destacou que “a resposta do público ao regreso do cine foi extraordinaria. Máis de catro mil persoas pasaron polo auditorio neste primeiro ano, demostrando que existía unha demanda real por recuperar este servizo cultural”. A edil engadiu que “queriamos celebrar esta data cunha película que forma parte da memoria colectiva do cinema mundial e que representa a capacidade que teñen as grandes historias para seguir emocionando xeración tras xeración”.

As entradas para as diferentes sesións estarán dispoñibles na billeteira electrónica do Concello de Muros e nas oficinas do Centro Cultural e Xuvenil de Muros.

---

O Auditorio do Centro Cultural e Xuvenil de Muros acollerá a estrea de “Cada día nace un listo”, a nova longametraxe da directora Arantxa Echevarría, que chega ás salas de cine o 5 de xuño.

A película está protagonizada por Hugo Silva e conta cun reparto integrado por Susi Sánchez, Dafne Fernández, Jaime Olías e Ginés García Millán. A historia segue a Toni Lomas, unha antiga estrela televisiva que, tras caer no esquecemento, recibe unha inesperada proposta para participar no roubo dun valioso cadro. Para levar a cabo o golpe reunirá un peculiar equipo no que cada integrante agocha as súas propias intencións.

Cada día nace un listo combina os elementos da comedia negra, a sátira social e o thriller para construír unha historia chea de picaresca, humor ácido e situacións tan disparatadas como imprevisibles.

As proxeccións terán lugar o venres 5 de xuño ás 21:30 horas, o sábado 6 de xuño ás 20:00 e 22:00 horas e o domingo 7 de xuño ás 19:30 horas.

A concelleira de Cultura do Concello de Muros, Caridad González, destacou que “seguimos apostando por ofrecer ao público de Muros as principais estreas cinematográficas no mesmo momento da súa chegada ás salas, ampliando a oferta cultural da nosa vila e achegando producións de primeiro nivel ao auditorio municipal”.

As entradas están dispoñibles na billeteira electrónica do Concello de Muros e nas oficinas do Centro Cultural e Xuvenil de Muros.

---

Xa están dispoñibles as entradas para as próximas representacións da Mostra de Teatro “Xosé Agrelo”, que continuará no Auditorio do Centro Cultural e Xuvenil de Muros con dúas novas propostas de teatro afeccionado.

O venres 29 de maio ás 20:30 horas representarase Un tranvía chamado desexo, a cargo de Sen Cancelas Teatro, grupo de teatro de Santa Comba. Pola súa banda, tamén poderá reservarse entrada para Fermento Vello, de O Xeito Teatro (Esteiro).

As entradas son gratuítas con reserva previa e poden retirarse a través da billeteira electrónica do Concello de Muros ou presencialmente nas oficinas do Centro Cultural e Xuvenil de Muros.

---

Xa están dispoñibles as entradas para a representación de Ensaio xeral sobre a risa, de Aquelando Teatro, que terá lugar o sábado 23 de maio ás 20:30 horas no Auditorio do Centro Cultural e Xuvenil de Muros.

As entradas son gratuítas con reserva previa e poden retirarse a través da billeteira electrónica do Concello de Muros ou presencialmente nas oficinas do Centro Cultural e Xuvenil de Muros.

A obra forma parte da programación cultural do auditorio e achegará ao público unha proposta teatral marcada polo humor e a reflexión arredor da risa e da condición humana.

• Sábado, 23 de maio · 20:30 h
• Auditorio do Centro Cultural e Xuvenil de Muros
• Entrada gratuíta con reserva previa
• Entradas

---

O Concello de Muros deu a coñecer o fallo do xurado do concurso de carteis das XXI Xornadas de Cultura Mariñeira “Muros Mira ao Mar”, unha edición na que se destacou especialmente o gran nivel das propostas presentadas.

O cartel gañador desta edición foi a obra titulada “Se che gusta a festa e o mar non esquezas vir a Muros Mira ao Mar”, realizada por Noa Fernández Lestón, alumna de 3º curso do CEIP Ramón de Artaza e Malvárez.

O resto de obras premiadas foron as seguintes:

• Premio entidades que traballan con colectivos con diversidade funcional: “Non fala do mar, vive a tradición e nace o sabor”, realizado polas persoas usuarias do centro de Valadares de ADISBISMUR.
• Premio Educación Infantil: “Os golfiños”, realizado por todo o alumnado de 4º curso do CEIP Ramón de Artaza e Malvárez.
• Premio 1º ciclo de Educación Primaria: “Mar”, de Avril Rama Rodríguez, alumna de 2º curso do CEIP Ricardo Tobío.
• Premio 2º ciclo de Educación Primaria: “Se che gusta a festa e o mar non esquezas vir a Muros Mira ao Mar”, de Noa Fernández Lestón, alumna de 3º curso do CEIP Ramón de Artaza e Malvárez.
• Premio 3º ciclo de Educación Primaria: “En Muros sempre xogamos, pero máis bailamos”, de Candela Lestón Fernández e Leire Santiago Luaces, alumnas de 5º curso do CEIP Ramón de Artaza e Malvárez.
• Premio Educación Secundaria: “A redeira”, de Lúa Lago Lago, alumna de 1º da ESO do IES As Insuas.

O xurado concedeu ademais dúas mencións especiais aos traballos “Onde a lingua se fai salitre”, realizado por Jorge Fernández, Carlos Figeuroa e Alejandro Cambeiro, alumnos de 6º curso do CEIP Ramón de Artaza e Malvárez, e “Arenisca”, de Sara Lourenzo Castro, alumna de 3º curso do CEIP Ramón de Artaza e Malvárez.

O concurso de carteis forma parte das actividades previas das XXI Xornadas de Cultura Mariñeira “Muros Mira ao Mar”.

---

| MES DAS LETRAS |
XVIII MOSTRA DE TEATRO “XOSÉ AGRELO”
Do 11 ao 30 de maio

PROGRAMA

---