Día e hora: sábado 7 de outubro, 20:30 h.
Local: Auditorio do Centro Cultural de Muros.
Actividade: Teatro – Ibuprofeno Teatro – “Deadpan Karaoke”.
Programa: Rede Galega de Teatros e Auditorios da AGADIC.
O sábado 7 de outubro, ás 20:30 h, chega ao Auditorio do Centro Cultural de Muros o espectáculo, “Deadpan Karaoke”, un espectáculo teatral fora do corrente, que explora a comedia e os seus límites dende unha perspectiva de xénero, abordando o tema do amor nesta sociedade; e no que o público tén un papel protagonista.
Deadpan, que en inglés significa “cara morta, baleira de expresión, imperturbable”, Karaoke, do xaponés Kara (baleiro) e oke (orquestra).
Deadpan Karaoke é un espectáculo unipersoal de carácter participativo que propón como ingredientes principais o absurdo, a estupidez, a sorpresa, a comedia, a música e o cine, e que trata de dar resposta á pregunta: É posible o amor nesta sociedade tardocapitalista na que vivimos? Deadpan é un personaxe incapaz de sentir e expresar emoción. A través das súas accións e grazas á contextualización das mesmas dentro dun karaoke, consegue facer accesibles e divertidas para o gran público cuestións e dilemas que ocupan aos grandes pensadores contemporáneos.
A protagonista absoluta da peza é a actriz Marián Bañobre, que baixo a dirección de Patricia Rodríguez, da vida a un espectáculo moi participativo que transita do real ao onírico e combina artes coma a música, o cine, a danza e o audiovisual. Un espectáculo moi participativo. Hai moita actividade, pracenteira, na que o espectador se vai sentir cómodo, a gusto, e mesmo coa posibilidade de cantar.
A protagonista da peza emprende unha viaxe en busca do sentimento, dando vida a unha personaxe inexpresiva e ao seu alter ego, una vistosa muller de vermello que personifica todo o que aspira a ser.
Ibuprofeno Teatro estreou ‘Deadpan Karaoke‘, a súa décima produción, o pasado sábado na Estrada. É a súa primeira montaxe cunha directora convidada, Patricia Rodríguez, que desenvolve a súa carreira entre Asturias e Londres. Marián Bañobre, a protagonista, recupera o seu papel de clown e preséntanos cuestións que dan que pensar, colocando ao espectador nun karaoke que transita do real ao onírico, do cine á vida a través da música e da sorpresa.
Esta función está incluída na Rede Galega de Teatros e Auditorios da AGADIC e as entradas, ao prezo de 3,50 €, poden ser reservadas nas oficinas do centro cultural, no teléfono 981762294, no correo cultura@muros.es ou no formulario creado para este fin https://buff.ly/3tbV8z7.
A concelleira de cultura de Muros, Caridad González, e todo o equipo de goberno, anima a todas as persoas de Muros a gozar con unha nova sesión de teatro, a primeira desta tempada. Nesta ocasión unha obra cómica, a vez que reflexiva e participativa; aproveitando para explicar que nesta tempada a programación de adultos se adiantará media hora sobre o que viña sendo habitual, pasando a ser o comezo dos espectáculos ás oito e media.