admin

TEATRO EN FEMININO NO CENTRO CULTURAL DE MUROS, NO MES DA MULLER TRABALLADORA

Día e hora: sábado 18 de marzo, 21:00 h
Local: Auditorio do Centro Cultural de Muros
Actividade: Teatro – A Panadaría – “As que Limpan”
Programa: Rede Galega de Teatros e Auditorios da AGADIC
Entradas, 3,50 €. Reserva previa

O sábado 18 de marzo, ás 21:00 h, chega ao Auditorio do Centro Cultural de Muros o espectáculo, “As que Limpan”, que trata sobre un tema de xustiza social, a loita organizada das camareiras de piso dos hoteis por conseguir uns dereitos laborais e sociais xustos. Escrito, dirixido e interpretado por Areta Bolado, Noelia Castro e Ailén Kendelman, A Panadaría, pois este equipo decide non querer traballar de xeito xerárquico; e esta obra tornouse especialmente asemblearia. Todas escriben, dirixen e interpretan tódalas personaxes, pois consideran que iso facilita que o importante sexa o que se conta.. Este espectáculo foi coproducido co Centro Dramático Nacional; e pode clasificarse coma comedia ou teatro documental

Un cartel colga do manubrio da habitación. “Por favor, arregle el cuarto”. Ao regreso da praia, as camas feitas, as toallas limpas e o baño impoluto. Son “as que limpan”, as invisibles que cargan ás súas costas un sistema turístico precarizador.
As que limpan fala da loita organizada das camareiras de piso dos hoteis por conseguir uns dereitos laborais e sociais xustos. Fronte a elas, a avaricia dos propietarios das cadeas hoteleiras.

As que limpan non fala só de traballadoras da limpeza, fala de mulleres e do chan mollado sobre o que camiñamos cada día.

Neste espectáculo, Areta Bolado, Noelia Castro e Ailén Kendelman, as tres tituladas en arte dramática e polifacéticas fundadoras de A Panadaría, formulan preguntas coma: ¿É posible revalorizar este traballo y desligalo do xénero? ¿Existe un turismo sostible? ¿Quen limpa a casa da limpadora?
Unha farsa hilarante e ao mesmo tempo reivindicativa da situación de explotación laboral que sofre este sector. Estas traballadoras, din, son a grande metáfora deste país, no que máis do 10% do seu PIB provén do turismo, en tanto se ve normal que máis do 99% das limpadoras sexan mulleres… E contra todo isto arremete esta compañía cun teatro cómico, popular, feminista e artesanal. Un teatro con escenografía mínima, ningún son gravado, un equipo integrado só por mulleres, con doses idénticas de acidez e humor, e que arrasan en cada espectáculo. En Muros xa puidemos gozar tamén do seu anterior traballo, “Elisa e Marcela”.

Esta función está incluída na Rede Galega de Teatros e Auditorios da AGADIC e as entradas, ao prezo de 3,50 €, poden ser reservadas nas oficinas do centro cultural, no teléfono 981762294, no correo cultura@muros.es ou no formulario creado para este fin.

A concelleira de cultura de Muros, Mayka González, anima a todas as persoas de Muros a gozar con outra nova sesión de teatro, nesta ocasión unha obra cómica, a vez que reivindicativa, sobre un tema que non é alleo a ninguén, especialmente axeitado para a reflexión nun pobo turístico, (aínda non masificado), e durante un mes de marzo.

Día e hora: sábado 11 de marzo, 18:00 h.
Local: Auditorio do Centro Cultural de Muros
Actividade: Teatro – OS MONICREQUES DE KUKAS – “VIVA VIVALDI (1, 2, 3 e catro estacións)”
Programa: Rede Galega de Teatros e Auditorios da AGADIC

No ano 2023 conmemórase o 300 Aniversario de “As catro estacións”, de Vivaldi, que inspiran ao grupo Os Monicreques de Kukas para crear un espectáculo no que representan os cambios que se producen en cada unha das estacións do ano con pequenas historias que valoran a importancia da amizade e das relacións afectivas e solidarias.

Unha pintora (Maruxa), unha escritora (Rosalía) e un músico (Antón) crearan un mundo fantástico e poético cunhas marionetas tratadas cunha paleta de cores brillantes e contrastados.

A autoría, o deseño, a escenografía e as marionetas, corresponden a Marcelino de Santiago Viqueira (Kukas); a versión musical, interpretación de guitarra e espazo sonoro, a Rubén Barros Deschamps; o deseño de iluminación a Miguel Cabaleiro Saco; e a dirección corresponde a Isabel Rey Pousada.

Interpretada por tres grandes da manipulación de monicreques, Marián González Rodríguez, Larraitz Urruzola Tolosa e Marcelino de Santiago.

Con estes antecedentes a boca estásenos facendo auga e xa nos tarda esta estrea, para a que a concelleira de cultura de Muros, Mayka González, agradece ao grupo Os Monicreques de Kukas tiveran a deferencia de elixir Muros; e anima a todo o público familiar da veciñanza a reservar a súa entrada, segura de que gozarán moito desta fabulosa estrea e inspirador espectáculo.

Os Monicreques de Kukas é unha compañía de referencia en toda Galicia e fóra da Comunidade, e conta no seu haber cos galardóns:
Premio Galicreques 2021, Premio da Crítica de Galicia das Artes escénicas 2020, Premio da Cultura Galega das Artes escénicas 2019, Premio Xiria da MITCFC polo seu labor teatral 2019, Homenaxe de Titiricuenca e Asociación Amigos do Teatro de Cuenca 2019, Mención de Honor polo seu traballo no teatro de bonecos do CDTB – Festival de Títeres Bilbao 1997.

O espectáculo está incluído na Rede Galega de Teatros e Auditorios da AGADIC. As entradas, con un prezo de 2,50 €, deben de ser reservadas nas oficinas do centro cultural, no teléfono 981762294, no correo cultura@muros.es ou no formulario creado para este fin.

PROGRAMA DO 17 AO 24 DE FEBREIRO.
ENTROIDO 2023.
CONCELLO DE MUROS.

17 | VENRES

16.00 h | FESTA DA MOCIDADE EN MUROS
Organiza Consellaría de Política Social e Xuventude da Xunta de Galicia

20.30 h | FESTA DE ENTROIDO PARA MAIORES EN SEL

18 | SÁBADO

17.00 h | FESTA INFANTIL DE DISFRACES EN TAL
Centro Agro vello

23.00 h | FESTA EN MUROS
Organiza A. Praia do Castelo

19 | DOMINGO

17.00 h | CONCURSO DE COMPARSAS

Premios:
Categoría INDIVIDUAL: 200 € – 100 € – 50 € – 50 €
Categoría GRUPOS: 500 € – 250 € – 125 € – 100 €
Categoría COMPARSAS: 1.100 € – 600 € – 300 € – 150 €

EXHIBICIÓN DE DISFRACES TRADICIONAIS DE TOREA E ABELLEIRA
ACTUACIÓN DA CHARANGA TANTO NOS TÉN

Documentos:
BASES | INSCRICIÓNS | CONSTITUCIÓN DE GRUPO | COMPROMISO RESPONSABLE

20 | LUNS

17.00 h | FESTA INFANTIL DE DISFRACES EN ESTEIRO
Pavillón X. Lago. Colabora ANPA de Esteiro e A.C. O Xeito

17.00 h | FESTA INFANTIL DE DISFRACES EN SERRES
Pozo do Cachón – Colabora ANPA Valdexería

21 | MARTES

17.00 h | FESTA INFANTIL DE DISFRACES EN ABELLEIRA
Surribos. Coorganizan AC. A Ponte vella e AVV. a Ostreira

17.00 h | FESTA INFANTIL DE DISFRACES EN LOURO
C Social. Colaboran ANPA Agra de Filgueira e SC Monte Louro

22 | MÉRCORES

19.00 h | ENTERRO DO FACUNDO

24 | VENRES

17:00 h | FESTA INFANTIL DE DISFRACES EN TOREA
Casa Reitoral. Colaboran veciños de Torea

18.00 h | FESTA DE DISFRACES BIBLIOTECA DE MUROS en San Xosé

Día e hora: sábado 4 de febreiro, 21:00 h
Local: Auditorio do Centro Cultural de Muros
Actividade: Teatro – Culturactiva – “As Alumnas”
Programa: Rede Galega de Teatros e Auditorios da AGADIC

O sábado 4 de febreiro, ás 21:00 h, chega ao Auditorio do Centros Cultural de Muros o espectáculo, “As Alumnas”, que trata sobre os temas, xustiza social, memoria histórica, igualdade e resiliencia, tendo a educación coma tema central. Escrito por Paula Carballeira, dirixido por Fina Calleja e interpretado por Anabell Gago e Mónica Caamaño. Todo un luxo.

Mónica Camaño e Anabell Gago atópanse no pasamento da súa mestra, María Barbeito, e condúcennos por unha senda emocional que arrinca desde que se coñecen na escola antes da Guerra Civil ata os anos 70.
Un fermoso artefacto escénico dirixido a un público adulto, que trata sobre a figura da pedagoga galega María Barbeito e sobre como o franquismo significou un enorme retroceso na educación do Estado, especialmente para as mulleres. A educación, peza fundamental no desenvolvemento e na liberdade das persoas, especialmente das mulleres, é o eixo fundamental da obra. As dúas personaxes femininas representan dous casos concretos de mulleres no marco histórico anterior e posterior á Guerra Civil, que nos levan a tocar as transformacións sociais do momento. As Alumnas busca facer un exercicio de re apropiación da realidade colectiva e individual, para reconstruír a memoria e espazos imaxinarios da nosa comunidade, creándose así un acto ético/ estético que se complementa coa participación de espectadores activos.

Esta representación está incluída na Rede Galega de Teatros e Auditorios da AGADIC e as entradas, ao prezo de 3,50 €, xa poden ser reservadas nas oficinas do centro cultural, no teléfono 981762294, no correo cultura@muros.es ou no formulario creado para este fin.

A concelleira de cultura de Muros, Mayka González, anima a tódolas persoas de Muros a gozar con outra nova sesión de teatro, nesta ocasión de corte social e cun estupendo reparto, dende a autoría ate a interpretación.