admin

Día e hora: sábado 1 de abril, 21:00 h
Local: Auditorio do Centro Cultural de Muros
Actividade: Teatro – Producións teatrais Excéntricas – “O Porco de pé”
Programa: Programación cultural da Excma. Deputación Provincial da Coruña

O sábado 1 de abril, ás 21:00 h, chega de novo ao Auditorio do Centro Cultural de Muros a compañía Producións teatrais Excéntricas, co espectáculo, “O Porco de pé”, unha colaboración da Deputación da Coruña, o Concello de Muros e a propia compañía, coa intención de que a poboación poda celebrar o día do Teatro, que se conmemora o 27 de marzo.

O Porco, o animal totémico dos cocidos e dos entroidos, toma os teatros para demostrar a súa superioridade sobre os seres humanos. O que presenta Excéntricas é un teatro de barracón. Un farol mortizo, un chan de serrín, unha cortina vermella e, de súpeto, aparece o porco en elegante pose de equilibrista a sosterse sobre os pés, a finxirse un ser humano con tanta graza, que resulta imposible distinguilo.

Vai para cen anos, Vicente Risco detectou unha nutrida presenza porcina vestida con elegantes abrigos e chapeus a confundirse cos propios burgueses. Descobreu que estaban entre NÓS! A divertidísima sátira do ourensán, a medio camiño entre o circo, o barracón, os fantoches e o cabarete, tén hoxe máis vixencia que nunca. Nesta viaxe á fascinante década do 20 do século XX, pasarán, coma nunha lanterna máxica, anarquistas, capitalistas, agraristas, proxenetistas, golpistas, vangardistas, caciquistas, cupletistas, mentalistas, futuristas, e budistas.

A estrea mundial d’O PORCO DE PÉ foi o 31 de marzo de 2022 no Teatro Principal de Ourense. En menos dunha semana, cerca de 2.000 persoas aplaudiron o esforzo dos artistas, marabillados da capacidade de transformación e multiplicación que exhiben. Ao final, só saen tres a agradecer os aplausos, iso sí, que tres, pois o elenco está composto por Patricia Vázquez, Víctor Mosqueira e Evaristo Calvo, mais polo escenario pasaron Madame Blavatski, o Elocuente Pregoeiro, o Porco Celidonio, Baldomero García, o Alfaite Nogueira, Dona Nicasia, O Doutor Alveiros, os cabezas parlantes Outeiriño e Forcadela, o Avogado Barbeito, Lolita Piné, os Siameses de Ventosela, Suso e Clodomiro, o Conde, a Venus Victrix, a Tenista Celidonia, Miguel Primo de Rivera, a Muller-Araña, o Demo, e máis.

A compañía Producións teatrais Excéntricas, fundada por Quico Cadaval e o dúo cómico Mofa e Befa, Evaristo Calvo e Víctor Mosqueira, é ben coñecida de tódolos muradáns amadores do teatro, pois é unha habitual no noso espazo escénico, onde sempre colleitan reflexión, risas e aplausos.

Esta representación está incluída na programación cultural da Deputación da Coruña e as entradas son de balde, mais poden ser reservadas de xeito anticipado nas oficinas do centro cultural, no teléfono 981762294, no correo cultura@muros.es ou no formulario creado para este fin, durante toda a semana.

A concelleira de cultura de Muros, Mayka González, anima a tódolos muradáns a gozar do humor e bo facer artístico dos nosos convidados e agradece á compañía e á Deputación a deferencia de elixir Muros para esta celebración.

TEATRO EN FEMININO NO CENTRO CULTURAL DE MUROS, NO MES DA MULLER TRABALLADORA

Día e hora: sábado 18 de marzo, 21:00 h
Local: Auditorio do Centro Cultural de Muros
Actividade: Teatro – A Panadaría – “As que Limpan”
Programa: Rede Galega de Teatros e Auditorios da AGADIC
Entradas, 3,50 €. Reserva previa

O sábado 18 de marzo, ás 21:00 h, chega ao Auditorio do Centro Cultural de Muros o espectáculo, “As que Limpan”, que trata sobre un tema de xustiza social, a loita organizada das camareiras de piso dos hoteis por conseguir uns dereitos laborais e sociais xustos. Escrito, dirixido e interpretado por Areta Bolado, Noelia Castro e Ailén Kendelman, A Panadaría, pois este equipo decide non querer traballar de xeito xerárquico; e esta obra tornouse especialmente asemblearia. Todas escriben, dirixen e interpretan tódalas personaxes, pois consideran que iso facilita que o importante sexa o que se conta.. Este espectáculo foi coproducido co Centro Dramático Nacional; e pode clasificarse coma comedia ou teatro documental

Un cartel colga do manubrio da habitación. “Por favor, arregle el cuarto”. Ao regreso da praia, as camas feitas, as toallas limpas e o baño impoluto. Son “as que limpan”, as invisibles que cargan ás súas costas un sistema turístico precarizador.
As que limpan fala da loita organizada das camareiras de piso dos hoteis por conseguir uns dereitos laborais e sociais xustos. Fronte a elas, a avaricia dos propietarios das cadeas hoteleiras.

As que limpan non fala só de traballadoras da limpeza, fala de mulleres e do chan mollado sobre o que camiñamos cada día.

Neste espectáculo, Areta Bolado, Noelia Castro e Ailén Kendelman, as tres tituladas en arte dramática e polifacéticas fundadoras de A Panadaría, formulan preguntas coma: ¿É posible revalorizar este traballo y desligalo do xénero? ¿Existe un turismo sostible? ¿Quen limpa a casa da limpadora?
Unha farsa hilarante e ao mesmo tempo reivindicativa da situación de explotación laboral que sofre este sector. Estas traballadoras, din, son a grande metáfora deste país, no que máis do 10% do seu PIB provén do turismo, en tanto se ve normal que máis do 99% das limpadoras sexan mulleres… E contra todo isto arremete esta compañía cun teatro cómico, popular, feminista e artesanal. Un teatro con escenografía mínima, ningún son gravado, un equipo integrado só por mulleres, con doses idénticas de acidez e humor, e que arrasan en cada espectáculo. En Muros xa puidemos gozar tamén do seu anterior traballo, “Elisa e Marcela”.

Esta función está incluída na Rede Galega de Teatros e Auditorios da AGADIC e as entradas, ao prezo de 3,50 €, poden ser reservadas nas oficinas do centro cultural, no teléfono 981762294, no correo cultura@muros.es ou no formulario creado para este fin.

A concelleira de cultura de Muros, Mayka González, anima a todas as persoas de Muros a gozar con outra nova sesión de teatro, nesta ocasión unha obra cómica, a vez que reivindicativa, sobre un tema que non é alleo a ninguén, especialmente axeitado para a reflexión nun pobo turístico, (aínda non masificado), e durante un mes de marzo.

Día e hora: sábado 11 de marzo, 18:00 h.
Local: Auditorio do Centro Cultural de Muros
Actividade: Teatro – OS MONICREQUES DE KUKAS – “VIVA VIVALDI (1, 2, 3 e catro estacións)”
Programa: Rede Galega de Teatros e Auditorios da AGADIC

No ano 2023 conmemórase o 300 Aniversario de “As catro estacións”, de Vivaldi, que inspiran ao grupo Os Monicreques de Kukas para crear un espectáculo no que representan os cambios que se producen en cada unha das estacións do ano con pequenas historias que valoran a importancia da amizade e das relacións afectivas e solidarias.

Unha pintora (Maruxa), unha escritora (Rosalía) e un músico (Antón) crearan un mundo fantástico e poético cunhas marionetas tratadas cunha paleta de cores brillantes e contrastados.

A autoría, o deseño, a escenografía e as marionetas, corresponden a Marcelino de Santiago Viqueira (Kukas); a versión musical, interpretación de guitarra e espazo sonoro, a Rubén Barros Deschamps; o deseño de iluminación a Miguel Cabaleiro Saco; e a dirección corresponde a Isabel Rey Pousada.

Interpretada por tres grandes da manipulación de monicreques, Marián González Rodríguez, Larraitz Urruzola Tolosa e Marcelino de Santiago.

Con estes antecedentes a boca estásenos facendo auga e xa nos tarda esta estrea, para a que a concelleira de cultura de Muros, Mayka González, agradece ao grupo Os Monicreques de Kukas tiveran a deferencia de elixir Muros; e anima a todo o público familiar da veciñanza a reservar a súa entrada, segura de que gozarán moito desta fabulosa estrea e inspirador espectáculo.

Os Monicreques de Kukas é unha compañía de referencia en toda Galicia e fóra da Comunidade, e conta no seu haber cos galardóns:
Premio Galicreques 2021, Premio da Crítica de Galicia das Artes escénicas 2020, Premio da Cultura Galega das Artes escénicas 2019, Premio Xiria da MITCFC polo seu labor teatral 2019, Homenaxe de Titiricuenca e Asociación Amigos do Teatro de Cuenca 2019, Mención de Honor polo seu traballo no teatro de bonecos do CDTB – Festival de Títeres Bilbao 1997.

O espectáculo está incluído na Rede Galega de Teatros e Auditorios da AGADIC. As entradas, con un prezo de 2,50 €, deben de ser reservadas nas oficinas do centro cultural, no teléfono 981762294, no correo cultura@muros.es ou no formulario creado para este fin.