admin

O Concello de Muros deu a coñecer o fallo do xurado do concurso de carteis das XXI Xornadas de Cultura Mariñeira “Muros Mira ao Mar”, unha edición na que se destacou especialmente o gran nivel das propostas presentadas.

O cartel gañador desta edición foi a obra titulada “Se che gusta a festa e o mar non esquezas vir a Muros Mira ao Mar”, realizada por Noa Fernández Lestón, alumna de 3º curso do CEIP Ramón de Artaza e Malvárez.

O resto de obras premiadas foron as seguintes:

• Premio entidades que traballan con colectivos con diversidade funcional: “Non fala do mar, vive a tradición e nace o sabor”, realizado polas persoas usuarias do centro de Valadares de ADISBISMUR.
• Premio Educación Infantil: “Os golfiños”, realizado por todo o alumnado de 4º curso do CEIP Ramón de Artaza e Malvárez.
• Premio 1º ciclo de Educación Primaria: “Mar”, de Avril Rama Rodríguez, alumna de 2º curso do CEIP Ricardo Tobío.
• Premio 2º ciclo de Educación Primaria: “Se che gusta a festa e o mar non esquezas vir a Muros Mira ao Mar”, de Noa Fernández Lestón, alumna de 3º curso do CEIP Ramón de Artaza e Malvárez.
• Premio 3º ciclo de Educación Primaria: “En Muros sempre xogamos, pero máis bailamos”, de Candela Lestón Fernández e Leire Santiago Luaces, alumnas de 5º curso do CEIP Ramón de Artaza e Malvárez.
• Premio Educación Secundaria: “A redeira”, de Lúa Lago Lago, alumna de 1º da ESO do IES As Insuas.

O xurado concedeu ademais dúas mencións especiais aos traballos “Onde a lingua se fai salitre”, realizado por Jorge Fernández, Carlos Figeuroa e Alejandro Cambeiro, alumnos de 6º curso do CEIP Ramón de Artaza e Malvárez, e “Arenisca”, de Sara Lourenzo Castro, alumna de 3º curso do CEIP Ramón de Artaza e Malvárez.

O concurso de carteis forma parte das actividades previas das XXI Xornadas de Cultura Mariñeira “Muros Mira ao Mar”.

| MES DAS LETRAS |
XVIII MOSTRA DE TEATRO “XOSÉ AGRELO”
Do 11 ao 30 de maio

PROGRAMA

O Auditorio do Centro Cultural e Xuvenil de Muros continúa coa súa programación cinematográfica cunha nova fin de semana de cine pensada para todos os públicos, coa proxección de “La familia Benetón +2” e “Maracuda”.

Por unha banda, chegará “La familia Benetón +2”, a nova entrega da comedia familiar protagonizada por Leo Harlem. A película continúa as aventuras da peculiar familia Benetón, que verá como a súa rutina cambia por completo coa chegada de dous novos bebés, multiplicando os enredos e situacións cómicas.

As sesións desta película terán lugar o sábado 16 de maio ás 20.30 horas e o domingo 17 de maio ás 19.00 horas.

A programación complétase con “Maracuda”, unha proposta de animación e aventuras ambientada na Idade de Pedra. O filme segue a historia de Maracuda, fillo dun líder tribal, que emprende unha viaxe chea de criaturas sorprendentes e desafíos xunto a un misterioso paxaro extraterrestre.

As proxeccións de “Maracuda” serán o sábado 16 de maio ás 18.00 horas e o domingo 17 de maio ás 17.00 horas.

A concelleira de Cultura do Concello de Muros, Caridad González, destacou a importancia de ofrecer unha programación variada para diferentes públicos: “Seguimos apostando por un cine accesible e diverso, con propostas pensadas tanto para o público familiar como para quen busca pasar unha fin de semana de lecer e cultura no auditorio”.

As entradas están dispoñibles na billeteira electrónica do Concello de Muros e nas oficinas do Centro Cultural e Xuvenil de Muros.

O Concello de Muros abre o prazo de inscrición para participar no Mercado Mariñeiro Tradicional “Muros Mira ao Mar” 2026 para aqueles postos externos que non pertenzan ao termo municipal do Concello de Muros.

O mercado celebrarase os días 10, 11 e 12 de xullo en distintas rúas e prazas da vila, no marco das XXI Xornadas de Cultura Mariñeira “Muros Mira ao Mar”, recreando o ambiente dun mercado tradicional galego de temática mariñeira.

Poderán participar postos de artesanía, gastronomía, produtos naturais, antigüidades e outras propostas relacionadas coa filosofía do evento. A organización valorará especialmente aqueles postos vinculados á cultura mariñeira e que contribúan á ambientación e dinamización do mercado.

As persoas interesadas deberán formalizar a súa solicitude a través do formulario dispoñible en https://inscricions.culturactiva.org antes do 22 de maio de 2026.

As bases completas e toda a información relativa ás condicións de participación poden consultarse na normativa publicada pola organización.

Máis información:

mercadomuros@gmail.com

656 785 469

Formulario de inscrición: https://inscricions.culturactiva.org

O Auditorio do Centro Cultural e Xuvenil de Muros acollerá a proxección de “Michael”, o biopic que retrata a vida e legado de Michael Jackson, unha das figuras máis relevantes da música a nivel internacional.

A película ofrece un percorrido pola traxectoria do artista, desde os seus inicios como membro dos Jackson Five ata a súa consolidación como estrela mundial, amosando tanto a súa evolución artística como aspectos da súa vida persoal. O filme combina momentos íntimos co recordo dalgunhas das actuacións máis icónicas da súa carreira.

As proxeccións terán lugar o venres 8 de maio ás 20.30 horas, o sábado 9 de maio en dúas sesións, ás 18.00 e ás 20.30 horas, e o domingo 10 de maio tamén en dobre sesión, ás 17.00 e ás 19.30 horas.

A concelleira de Cultura do Concello de Muros, Caridad González, destacou o interese desta proposta: “Seguimos apostando por unha programación cinematográfica variada e atractiva, que achegue ao público tanto grandes producións actuais como historias que forman parte da memoria colectiva”.

As entradas están dispoñibles na billeteira electrónica do Concello de Muros e nas oficinas do Centro Cultural e Xuvenil de Muros.

O Auditorio do Centro Cultural e Xuvenil de Muros acollerá unha nova fin de semana de cine coa proxección de dúas propostas dirixidas a distintos públicos: “Calle Málaga” e “Tafiti y sus amigos”.

Por unha banda, proxectarase “Calle Málaga”, un filme protagonizado por Carmen Maura que narra a historia de María Ángeles, unha muller de 79 anos que vive en Tánxer e que ve como a súa vida cambia coa chegada da súa filla, decidida a vender o fogar familiar. A película aborda temas como a identidade, a memoria e a capacidade de reinventarse, nun relato íntimo e emotivo.

As sesións terán lugar o venres 1 e o sábado 2 de maio ás 20.30 horas, así como o domingo 3 de maio ás 19.00 horas.

Por outra banda, o público familiar poderá gozar de “Tafiti y sus amigos”, unha aventura de animación que conta a historia dunha pequena suricata que, xunto a un inesperado compañeiro, emprende unha viaxe polo deserto para atopar unha flor capaz de salvar ao seu avó. Unha proposta chea de valores como a amizade, a cooperación e a superación.

Esta película proxectarase o sábado 2 de maio ás 18.00 horas e o domingo 3 de maio ás 17.00 horas.

A concelleira de Cultura do Concello de Muros, Caridad González, destacou a importancia de ofrecer unha programación diversa: “Seguimos traballando para achegar propostas cinematográficas que combinen diferentes xéneros e públicos, garantindo unha oferta cultural estable e accesible cada fin de semana”.

As entradas están dispoñibles na billeteira electrónica do Concello de Muros e nas oficinas do Centro Cultural e Xuvenil de Muros.

A Biblioteca Municipal de Muros acollerá o vindeiro 24 de abril ás 18.00 horas unha actividade especial con motivo do Día do Libro, co contacontos “Cantaruxa Catuxa”, a cargo de Aida Cobas.

A proposta está dirixida a público familiar a partir de 3 anos e presenta a historia de Catuxa, unha nena que pasa moito tempo coa súa avoa Adolfina, unha muller que vive a música con alegría e espontaneidade. A través dun xogo de procura do tesouro no faiado, Catuxa irá superando diferentes probas relacionadas co canto e coa percusión tradicional, nunha experiencia lúdica que promove a participación e a creatividade.

O espectáculo, cunha duración aproximada de 45 minutos, combina narración oral, música e interacción co público, convidando ás crianzas a descubrir o valor da expresión artística e da tradición oral.

A concelleira de Cultura do Concello de Muros, Caridad González, destacou a importancia de celebrar o Día do Libro con actividades para os máis pequenos: “É fundamental fomentar o gusto pola lectura e pola cultura desde idades temperás, e propostas como esta permiten achegar a literatura e a música ás familias dun xeito divertido e participativo”.

A actividade enmárcase no programa Ler conta moito da Xunta de Galicia e contará con entrada libre ata completar aforo.